Migu Quasimodogeniti, 19 April 2020

AGENDRE BA WEMAOSO YESU Migu Quasimodogeniti, 19 April 2020, Nifalua ba Nomo Mbanua Niha Keriso

1. Fangowai

Sondr. Agendre Sato Sondr Sato

:   : : :

Ya’ami banua Zo’aya, No oi owulo ita oi faondra ba wa’owuawua dödö, me no maoso Zo’aya ya’ita Yesu Keriso moroi ba ngai zi mate. Andrö, ba döi Yesu ma’owai ami: “No maoso Keriso”! Duhu no Maoso Keriso! Ya faofao khömi Lowalangi, Yafao khöu GehehaNia.

2. Manunõ: BZ 1: 1-2 Haleluya Khö Yehowa

1	Haleluya khö Yehowa, wa’omuso dödögu Suno Ia si lö aetu, khö-Nia wanunögu Sagötö fa’aurigu, lö ubato wanuno
2	Ya’ahowu dozi niha, samati khö Yehowa Sanötöna fangorifi, ba döi Yesu So’aya Saro tödö ba da’ö, fa’auri dötönafö

3. Votum

Sondr     Sato

:     :

Da tafohohou wa’aurida andre ma’afefu ba wa ha sambua khõ Zo’aya, muzizio ita fefu; No owulo ita ba da’e, ba dõi Lowalangi Ama, ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa sombõi banua si yaŵa awõ danõ. Yaduhu Mudadao zato

4. Fombaso Taroma Li Lowalangi: Yesaya 48:16–22

16	Miʼondrasido, mifondrongondrongo daʼe Iʼotarai mbõrõta, ba tenga ba zogõmigõmi fahuhuo ndraʼodo; alua, ba so ndraʼodõ. Ba iadaʼe, ba no ifatenge ndraʼo Soʼaya, Yehowa, awõ Gehehania.
17	Imane Yehowa, sangorifi yaʼugõ, Niʼamoniʼõ Ndraono Gizeraeli andrõ: Yaʼo, Yehowa, Lowalangiu zamahaõ yaʼugõ ba zoguna khõu, samasao yaʼugõ ba lala nitõrõu.
18	Enaʼõ õtõngõni goroisagu andrõ, ba hulõ hohou nidanõ waʼohahau dõdõu ba hulõ ndrulu nasi waʼatulõmõ.
19	Si mane ene enaʼõ maʼuwumõ ba madou mbotou andrõ, ba si mane faʼoya ngawua nene. Ba tõira andrõ, ba lõ tetayaigõ ba lõ tebunu ba gametahõgu.
20	Miheta ami ba Mbabeli andrõ, miʼoloi, mirõi Ndrawa Geledaia, miʼaʼiki, miʼebuaʼõ li! Miʼombakhaʼõ, mituriaigõ, miforongogõ, irugi ba wondrege danõ! Mimane: No iʼorifi genoninia maʼuwu Yakobo andrõ Yehowa!
21	Ba lõ owõkhi dõdõra, me ifatõrõ ira ba danõ si mate; ifalua saʼae ba gara gõra idanõ, ifabali gara, fa mangele nidanõ!
22	Ba zebua horõ, ba lõ faʼohahau dõdõ, iwaʼõ Yehowa.

5. Fangandrõ Wangefa Horö, Muzizio ita fefu………..

Mangandrõ ita:

He So’aya ya’aga Yesu Keriso si mate ba röfa ba hili Gologata, ba si no maoso moroi ba ngai zi mate. Faduhu dödöma ba daroma Li-Mö me Õwa’ö: “Ya’odo wemaoso ba fa’auri, samati khõ-Gu, ba auri, heŵa’ae mate ia.” Ba hiza, ba lala wa’aurima sero ma’ökhö asese ma’ositengagö ba ma osilö’ögö Ndra’ugö So’aya, me ma’o’ö nifakhoi dödöma samösa. Bologö dödö-U khöma, ba be’e aefa khöma horöma andrö. Hakhösi dödö-U khöma So’aya, böi tehe tekiko, törö tödö-U wa’ebua dödö-U ba fa’ahakhö dödö-U khöma. Böi faefa ndra’aga moroi ba wa’omasi ba ba wangorifi andrö si no öhönagö ba zamati khö-U…..

(Mangandrö ba dödö zamösana föna Lowalangi… 1 irugi 2 meniti)

Hakhösi dödöU khöma, Ama, ba be’e aefa khöma horöma andrö ma’afefu…….Yaduhu.

Manuno: Buku Zinunö 224:1, “Na ubini’õ horõgu khõ-U Yesu…..”

Na ubini’ö horögu khö Yesu, Ba lö usöndra zahono dödögu. U’ombakha’ö ngawalö horögu, molala dödö.

Turia wangefa horõ:

“Imane taroma Li Lowalangi: ‘Ba no erege dödö-Gu õbe’e ba horõu andrõ; no õfakao-Do olalõwamõ. Ya’o, Ya’odo andre zamunu lalõu andrõ, bõrõ Ndra’o, ba lõ’õ sa’ae itõrõ tõdõ-Gu horõu.

(Mudadao zato)

6. Manunö: Buku Zinunö 191:1-2, Na Owökhi Dödöda

1	Na owökhi dödöda, tabu ta’ondrasi Yesu. Khöda göi Ifa’ema, Ibokai nidanö gumbu. Lö falukha ba mbö’ö ha khö Yesu so da’ö.
2	No ikaoni So’aya, zabu tödö ba horöra. Sanutunö khö-Nia, fefu ngawalö zalara. Ha zi tosasa tödö, ae khö Yesu angandrö.

7. Fombaso Taroma Li Lowalangi 1Fetero 2:1-5

1	Ba milohõli fefu waʼafaito, awõ ngawalõ walimosa fefu, awõ wamini tõdõ, awõ waʼafõkhõ dõdõ, awõ ngawalõ wamõbõgõ si lõ sõkhi, fefu.
2	Hulõ ndraono sawena tumbu, omasi ami zusu andrõ, si oroi daroma li andrõ, si lõ si faruka, enaʼõ tedou ami, ba khõnia andrõ, fangorifi,
3	na no mitandra waʼasõkhi dõdõ Zoʼaya.
4	Na miʼondrasi ia, gowe sauri andrõ, nitiboʼõ niha sa, ba nituyu Lowalangi, sebua bõli khõnia;
5	ba mibeʼe nifaʼanõ gõi ami, gowe sauri, omo Geheha, ba woʼere niʼamoniʼõ ba wameʼe sumange niʼaʼasogõ Geheha, somasi Lowalangi, balazi Yesu Keriso.

8. Manunö: Buku Zinuno 261:1-3 + 6 (Te’owuloi wasömbata)

1	Ya’e zumange fasömbata. Ma’ohe sumange Yehowa. Reff: Ma’andrö khö-U fahowu’ö. Zumange ni’ohema khö-Mö
2	Ya’e zumange fasömbata mabe’e soroi ba dödöma. Reff:………………
3	Ya’e zumange fasömbata. Buala si’otarai Nama. Reff:………………
6	Ya’e zumange fasömbata. Ma’aohasi gölö Zo’aya. Reff:………………

9. Manunö: Buku Zinunö 163:1 “Uhonogö sibai dödögu….”

Uhonogö sibagi dödögu, ba wamondrondrongo li-Mö Yesu Mangalulu ndra’odo föna-U, ba gametahö-Mö iada’a Öbayoini Eheha-U Yesu, dozigö mbanua samati khö-U Ubokai dödögu khö-U Yesu, nahia daroma li-U Taroma li-Mö, lö fa’atebulö Menewi ma’ökhö, ba si’ogötö’ö, lö sa mamalö Taroma li-Mö, si möi fangabölö Utema’ö soroi ba dodo, tolo ba wolo’ö

10. Angerõnua: Sinunö 42:1–6

1	Khõ duka wanunõ andrõ. Famahaõ; nilau Ndraono Gora andrõ.
2	Si mane faʼowõkhi dõdõ mbõhõ, ba wamadu idanõ soluaha, si manõ waʼowõkhi dõdõgu khõu, yaʼugõ Lowalangi.
3	Owõkhi dõdõgu khõ Lowalangi sauri andrõ. Ha waʼara tõ ukhamõ wangoromaʼõ yaʼodo khõ Lowalangi?
4	Ubadubadu dawa hõrõgu, bongi maʼõkhõ, bõrõ wa maʼõmaʼõkhõ lasofu khõgu: ”Heza so Lowalangiu andrõ?”
5	Daʼõ uʼangeragõ, ba ufaduwa nõsi dõdõgu bakha, me fao ndraʼo ba zato andrõ, me uʼohe ira ba nomo Lowalangi, me manunõnunõ ndraʼaga ba me mangandrõga saoha gõlõ — sato, si mõi ba gowasa.
6	Hadia wa no õkaõndrõʼõ, yaʼugõ tõdõgu, wa lõ ahonoʼõ bakha? Dõnadõna khõ Lowalangi! Usuno na sa ia, fangorifigu ba Lowalangigu.

 

FA’OWÓKHI DÖDÖ KHÖ LOWALANGI I’A’ASOGÖ WANÖTÖNA Sinunö (Mazmur) 42:1–6 Ira Talifusö Ni’omasiö ba Khö Keriso….. Selamat Paskah. Ta’andró saohagölö khö Zo’aya ya’ita Yesu Keriso, si no mondrorogö fa’aurida irugi ia’da’a. Ba ndröfi 2020 andre, ba no faehu sibai ita ba wamalua fanörö tödö wa’amate Yesu (Jumat Agung), ba famalua wanörö tödö femaosoNia  (Paskah). Me lö owulo ita ba gosali, ba lö tefalua gowasa Paskah simane halöwö fahulösa ba daromali ma olahraga, maena ba tanö bö’önia. No so ita ba wa’abu dödö si no manöröi ulidanö, ya’ia fökhö tungö corona. Ba zi no alua andre ba so khöda wa’ata’u ba fanizi dödö. Ba hewa’ae simanö ba fangaro wamatida khö  Yesu da’ö. Mendrua manö fa’amate ba femaosoNia ba khöda manandrösa da’ö ena’ö aheta ita ba gurunga horö ba ta söndra wangorifi. Hewa’ae no itöröi corona gulidanö, ba tebai ifabali ita khö Yesu Keriso. Ba nomoda zamösana ta’omusoi’ö dödöda wamalua Paskah, hewa’ae ha sambua omo ita ba ta’omusoi’ö dödöda ba wamati. Taroma Li Lowalangi ni’erönusida ma’ökhö andre, tefaehagö khöda, hewisa niha si no ihawui noro dödö ma fa’abu dödö, somasi falukha wa’ebua dödö Lowalangi. Na ba wa’abu dödö so niha, ba oya manö ifa’ema zi no amaedola angandröwa dödönia, börö gabula dödö andrö, ena’ö so wa’ahono dödö, ena’ö so zi tobali fanuturu lala ba noro dödö, ena’ö falukha famadöhö wökhö, ena’ö so wa’atulö ba zi fa’udu, ena’ö so wamalalini gera’era ba nösi nomo, ba oya na  tanö bö’önia. Si no amaedola nidö’udö’u ma somasi dödö zolau sinunö andre, ya’ia wa omasi ia i’ila Lowalangi. Tabaso da’ö ba ngawua 3: “ha wa’ara tö ukhamö wangoroma’ö ya’odo khö Lowalangi”. Ba da’e, tefo’amaedola simane “fa’owökhi dödö mböhö nidanö soluaha”. Na ta töfaigö khöda “wa’owökhi dödö andrö”, nirasoida ya’ia wa’oköli dölötölöda. Ha idanö daludalu wa’owökhi dödö, tenga fakhe. Itugu abakha wa’owökhi dödö zolau sinunö andre, me lamane khönia awönia “heza so Lowalangiu andrö”? Fehede da’e tenga sanolo ya’ia ba wa’abu dödönia, andrö wa iwa’ö ba wangaröngarönia ubadubadu dawa hörögu bongi ma’ökhö. Ba wanofu niha andrö khönia, tenga samolala ngaröngarö dödönia, lö awönia, ba hulö lö Lowalanginia. Ba hiza, lö ibali’ö fa’ngareu dödönia wehede niha andrö, ibali’ö fanusugi ba fangaro dödönia wa so Lowalangi sangorifi ya’ia (6). Andrö wa i’alui lala ba wangondrasi Lowalangi andrö, sanolo ba sangefa’ö ya’ia. Hadia nifaluania? Ifalua wasumangeta ba fangandrö khö Lowalangi. Ira Talifusö Ni’omasiö ba Khö Keriso….. Famalua lala wasumangeta ba ndraono Gizaraeli ba Gamabu’ula Li Siföföna, ba no la‘osambua’ö ba nomo Lowalangi. Andrö ba zura Zinunö andre ba oi dozi muhi’a dödö we’amöi ba nomo Lowalangi. Hewa’ae ba wa’abu dödö so ia (5), ba moroi ba nahia saröu, ba lö ibato wofanö, si fao niha sato. Lö göi ibali’ö tabitabinia niha sato, no i’osambalö’ö dödönia ba wangondrasi Lowalangi. Hana wa so wehi’a dödö simanö? Börö me so gohitö dödönia möi falukha khö Lowalangi. Andrö wa imane “Dönadöna khö Lowalangi”. Irege fefu wa’ata’u, noro dödö, fanizi dödönia, ba tetayaigö börö wanötönania khö Lowalangi, börö wehi’a dödönia möi falukha khö Lowalangi. Inötö si so ita ia’da’a, ba no itöröi gulidanö tungö corona, nifotöi COVID-19. Ba duria nirongoda, ha wa’ato niha si no mofökhö, ba so göi zi no mate. Ba tatu so zi tobali tötönaföda ba gametau’ö si no mamasui ya’ita andre. Tatötöna ena’ö alio taya dungö corona andrö, ena’ö alö zi göna fökhö andre (terinfeksi), monönö zidöhö ba rumah sakit, he göi ba nomo, te’alösi wa’ato zimate, ba ena’ö lafondrondrongo ba la o’ö niha sato (masyarakat) wamangelama nifa’ema zamatörö ba sondrönia’ö ba agama. Oi da’e fefu nidö’udö’u dödöda ba ta’ohe sindruhundruhu ba wangandrö khö Lowalangi. Böi aetu wanötönada khö Lowalangi, hewa’ae ba hunö wa’abu dödö so ita iada’a, he lamane khöda awöda heza so Lowalangiu andrö, hezo so wamatimö, hana wa miduhö nomo Lowalangi, böi awuwu ita, khö Lowalangi, böi aetu wanötönada. Ya’ami ira talifusö ni’omasi’ö ba khö Keriso Yesu. Ya hulö simane solau sinunö ita ba Daroma Li Lowalangi ma’ökhö, “ya sowökhi tödö ba wamadu idanö, simanö ita wangalui ba fanötönada khö Lowalangida. Iada’a la’andrö khöda fefu  ena’ö mohalöwö ba nomo, mombaso (belajar) ba nomo, fasumangeta (beribadah) ba nomo. Hadia nifaluada fefu ba nomo andre ba i’ila Lowalangi da’ö fefu, me lö omasi ia göi na tekiko ita. Lö irai faute mbu’u LiNia, wa so IA ba gotalua zamati khönia, fao Ia khöda (Emanueli, awöda Lowalangi). Andrö Simane wa’owökhi dödö sanura zura andre nomo Lowalangi, ba simanö göi ita ma’ökhö andre. Mendrua manö ba migu silalö fa’aefa ngaluo sebua khöda, fa’amate ba femaoso Yesu. Sindruhunia oya lala halöwö zi no mufa’anö ba Paskah andre. Paskah ba ndröfi andre ba lö owulo ita zi sambua Resort, Jemaat, Lingkungan, Organisasi ba wamalua gowasa Paskah. Ba hiza Eheha Ni’amoni’ö zangosambua yaita ba khö Yesu. Andrö te’osambua’ö göi ita ba wanötöna khö Lowalangida. Iada’e, da ta’osara’ö lida wanguma’ö “dönadöna khö Lowalangi! Usuno na sa Ia, fangorifigu ba Lowalangigu” (fahela ayati 6). Moguna itörö tödöda wa famalua fasumangeta ba nomo, tenga sibohou da’e ba wa’aniha Keriso. Banua niha Keriso si föföna, ba lafalua göi wasumangeta (ibadah) ba nomo’omo. Na tasekhegö tödö göi hewisa me föna, wa fatua lö mu’otomosi gosali, ba ba nomo tefalua wasumangeta (ibadah), ba ma zui ba balai desa, ba ma mu’ehao losu. Awena orahu wamalua fasumangeta ba gosali, me no awai domosa. Moguna aboto ba dödöda wa osali ba ma omo no nahia wangosambua’ö ya’ita khö Lowalangi ba ba nawöda niha. Bahiza, tefasugi ba dödöda Daroma Li Lowalangi wa famosumange Lowalangi, no ba Geheha ba ba wa’atulö (Yoh 4:24), ba tola tefalua da’e ba gosali, he göi ba nomo, mendrua manö me so waba samasui iada’e. Andrö börö da’ö, tekaoni ita ena’ö lö mamalö sowökhi tödö ita wangondrasi, wasumangeta, ba fangandrö khö Lowalangi. Me aro ita ba wamati ba ba wanötöna, tafaduhu’ö wa Yesu Keriso, zanolo, sangefa’ö ba sondrorogö ya’ita. Ha Ya’ia Lowalangida, we’ewe’e dödöda. Yaduhu! Tatanö ba dödöda nitanö ba dödö moroi ba zura Zinunö 42:2 “Si mane faʼowõkhi dõdõ mbõhõ, ba wamadu idanõ soluaha, si manõ waʼowõkhi dõdõgu khõu, yaʼugõ Lowalangi.” Yaduhu.

Manunö: Buku Zinunö 154:1, “No mafondrondrongo liU

1	No mafondrondrongo li-U, Lowalangi So’aya Tanö ba dödöma ia, faböi olifuga Fahowu’ö ia khöma, ena’ö ohahau dödöma fefu Heta ba dödö zi lö sökhi, ma’o’ö niwa’ö-U

11. Tuho wamati

Me no tarongo daroma Li Lowalangi, ba da tafaogö lida wamaduhu’ö famatida ya’ita niha Keriso fõna Lowalangi, muzizio ita fefu…….. endronga lida:….

Ya’o mamati khö Lowalangi Ama si lö ambö fa’abölö, somböi banua si yaẅa awö danö. Ya’o mamati khö Yesu Keriso, So’aya ya’ita, Ono Lowalangi si ha samösa, nitema nina-Nia Maria khö Geheha Ni’amoni’ö, ono nono alawe Ia, no manaögö huku Ia, barö mbawa Fondrio Filato, teforöfa Ia, mate, ba lako’o. No möi Ia ba mbanu niha tou, no maoso Ia moroi ba ngai zimate me no irugi tölu ngaluo. No manahae Ia, möi ba zorugo, dumadao ba gambölö Lowalangi Ama si lö ambö fa’abölö. I’otarai da’ö mangawuli Ia dania ba wanguhuku niha sauri, awö zi no mate. Ya’o mamati khö Geheha Ni’amoni’ö, ba ufati ha sambua mbanua ni’amoni’ö, fefu niha Keriso, fa’awösa niha ni’amoni’ö, ba fangefa horö, ba femaoso mboto zimate, ba fa’auri si lö aetu. Yaduhu.

Dumadao zato

13. Manunõ: Buku Zinunö 209:1-2, “Yesu Gumbu wa’auri”

1	Yesu gumbu wa’auri, sangorifi samati Mitabu ta’ondrasi afu auri ita göi. Ha khö Yesu so da’ö, lö tesöndra ba mbö’ö.
2	Do Keriso So’aya da’ö wangorifida. Möi  fangefa horöda na mamati göi ita. Lö a’ozu tehuku, na no ta’o’ö Yesu.

14. Fangandrõ Salahi + Fangandrõ Zo’aya

1. Fangandrö salahi:……………………………………………..
2. Fangandrö Zo’aya

He Ama khöma si so ba zorugo, ya te’amoni’ö döi-U. Ya tobali banua-U fefu niha, ya itörö zomasi Ndra’ugö, hulö ba zorugo, ya si manö göi ba gulidanö. Öma sirugi ma’ökhö be’e khöma ma’ökhö andre. Ba efa’ö khöma horöma, si mane fangefa’öma sala ba zi so sala khöma. Böi ohe ndra’aga ba wanandraigö, efa’öga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awö lakhömi, irugi zi lö aetu. Yaduhu.

15. Howuhowu:

Datatohugõ wekolida si fao fa’ohahau dõdõ, ya tobali ita sura Keriso, samaduhu’õ Ya’ia ba lala wa’aurida sero ma’õkhõ, ba ta’andrõ howuhowu Lowalangi (Muzizio ita fefu)

• Ya mufahowu’õ ita Lowalangi, Ya murorogõ ita
• Ya mufohaga mbawa-Nia khõda, Ya mu’ebua’õ dõdõ-Nia khõda
• Ya mufalemba hõrõ-Nia khõda, Ya mube’e wa’ohahau dõdõ khõda fefu. Yaduhu.

16. Manunõ: BZ 211:1 Ahono Ae Dödögu

1	Ahono ae dödögu, ba danga-Mö Yesu. Börö wa’omasi-Mö, ohahau dödögu. Fanunö mala’ika, da’ö nirongogu. Soroi zorugo yawa, omuso dödögu. Reff:    Ahono ae dödögu, ba danga-Mö Yesu.             Börö wa’omasi-Mö, ohahau dödögu.

 

YA’AHOWU!

 

LÖ LALALALA DÖDÖ…….![1]

(Hoho Nifa’anö: Pdt. Dr. Tuhoni Telaumbanua, M.Si [Ephorus BNKP])

Bahiza me muliha, muhöngö,
Hiza me muzawili ba gölia ulidanö,
Udu samakiko, samahö uwu dödö,
Udu si lö oroma, samakiko sohöwö,
Ya’ia zotöi Corona, emali si lö faoro ba hörö.

Ba oi fa’alai zowanua, oi mo’ira laoyo niha danö
Oi mukhölö danö ba zalawa danö,
Oi alau ba mbaho woloi niha sagabölö,
Oi laduhö mbawa göli mbanua,
Oi laduhö mbawa ndruhö zi oi omo hada,
Ha börö dungö Corona, si onarai mbanua Wuhan.

Mu’ira khöma dödö yawa gate,
Oi mu’ao khöma dödö yawa mbo,
Me no ihandro nuwu dödö tungö si’ite
Me no ifahö hunö mbo tungö si lö bo.
Me no ngahönö, zi no moloi ndro ana’ate,
Me no ngahönö, zi no latunu lako’o.

Mu’aoga khö Gere yawa zi hönö,
Oro’ö khöma döröu famunu waba,
Be khöma daludalu famunu tungö sama’ala.
Be khöma daludalu fangokafu zokho dödötölö,
Daludalu famadöhö oboula mbo ni’usu Corona..
Ba lö lala khö Gere zi hönö yawa niha,
Lö famokai dödö moroi khö razo, uwu zihönö.

Ma’alui mba’aba’a dungö, famaeri boto tanö,
Lö tesöndra, no ahani ba molö sinönöi tanö
Ma’obini mbulu gombuyu, bulu manawa danö,
Lö mobiso, lö mosöfu, oi tobali oboula danö.
Ma’okhoi’ö khöma mboto tanö, ba zino siriri sihandro tanö,
Ba lö sa’atö taya wanizi döla, no ihawuiga fa’aombö dödö.

Maba’agö dungö samakiko andrö,
ma sasai danga sifao sabu samunu dungö,
Mabalugö khöma mbawa, ikhu awö hörö,
Fa lö itörö tungö sanöröi tanö.
Ba lö sa’atö fa’ahono dödö.
Me lö banua si lö itörö tungö,
Me lö banua so ahonoa dödö.

Andrö mu’aoga mangalulu khö Zo’aya
Mu’aoga wo’angaröfili Ama.
Böi faigiga ba golalöwama,
Böi erai horö nifaluama.

Me lö sawatö we’ewe’e dödö
Me lö tötönafö samolala tödö,
Me lö khöma lalalala dödö.
Ha ya’ugö Yesu zi tola mangefa’ö.
Me ha ya’ugö Yesu, si tola mamadöhö,
Me no ö’asiwai yawa ba röfa wangöhöli hörö.
Me no osalahiniga we’ao: “He Lowalangigu 2x hana wa ö’erogö ndra’o?

Andrö möiga mangalulu mangandrö,
Moroi ba nomo ni’amualagöMö,
Ma’andrö saohagölö khö Zokhö,
Me no Ya’ugö gubalo, samolala tödö.
Si no mate, si no maoso, ba si no möna wolawa razo dungö,
samufu uwu dödö.
Ha ya’ugö Yesu zindruhu dötönafö.
Ya’alua ba zomasi zokhö.

[1] https://web.facebook.com/permalink.php?story_fbid=2618799278445685&id=100009469157037

 

Link file di sini

Posted by yonifati inci Uncategorized